മനസ്സിൽ മാഞ്ഞുപോയ കുറേ ഓർമ്മ -
കളുണ്ട്
മേഞ്ഞു നടക്കുന്നവയും .
എല്ലാ ഓർമ്മകളുടേയും മേലേക്ക്
പാഞ്ഞുകയറി വരുന്ന ഒരോർമ്മയുണ്ട് !
ആ ഒറ്റഓർമ്മമതി എന്നെ എനക്ക് മറക്കാ-
തിരിക്കാൻ !!
കട്ടിലിൽ മലർന്നു മരിച്ചു കിടക്കുന്ന അച്ഛൻ
കട്ടിൽ പടിയിൽ തല ചായ്ച്ചു കരയുന്ന അമ്മ.
അമ്മയുടെ അരികിൽ വേഗം ഓടി ചെന്നപ്പോൾ
അമ്മ നോക്കിയ ഒരു നോട്ടമുണ്ട്
ആ നോട്ടത്തിൽ നിന്നായിരിക്കണം
എന്നെ ഞാൻ വായിക്കാൻ പഠിച്ചിട്ടുണ്ടാവുക !
ആ നോട്ടം അതിന്നും മനസ്സിലുണ്ട്
പിന്നെ ഒന്നും ചോദിക്കുവാൻ തോന്നിയില്ല
പകച്ചു നിന്ന പ്രായം പതുക്കെ പിച്ചവെച്ചു.
ഇന്നും;
അമ്മയെ ഓർക്കുമ്പോഴൊക്കെ
അന്ന് ചോദിക്കാതിരുന്ന എന്തോ ഒന്ന്
'വേണ്ട ,വേണ്ട' - എന്ന് ഉള്ളിൽ നിന്ന് -
തൊണ്ടക്കുഴിയിൽ വന്ന് മുട്ടി നിൽക്കുന്നു
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ