ഉണ്ടായിരുന്നു

കളകളമാരവമോടെ പതഞ്ഞു പുതഞ്ഞൊ-
ഴുകുന്നൊരു പുഴയുണ്ടാർന്നു
മദപ്പാടാലെ മദിച്ചു വരും കരിവീരൻപോലെ
കുന്നുണ്ടാർന്നു
കാറ്റു കനക്കും കാഴ്ചകൾ കാണാൻ
കൂട്ടം തിങ്ങിയ കാടുണ്ടാർന്നു

പച്ചപ്പട്ടു ഞൊറിഞ്ഞും കൊണ്ടേ
സുന്ദരിയാമൊരു വയലുണ്ടാർന്നു
മുത്തു പഴുത്തൊരു നെൻമണി കൊത്താൻ
കൂട്ടത്തോടെ കിളിയുണ്ടാർന്നു

കൂട്ടം തെറ്റിയ കോടക്കാറുകൾ
കുന്നിൻ മേലെ വരവുണ്ടാർന്നു
പകൽക്കിനാവിൻ പച്ചപ്പുകളാൽ
കൊച്ചൻമാരു വരവുണ്ടാർന്നു

പച്ചതെങ്ങുകൾ തളിർ വിരലാട്ടി
സ്വാഗതമോതുക പതിവുണ്ടാർന്നു
കൊറ്റികൾ,കറ്റകൾ കൊയ്യും വയലിൽ
കൂട്ടത്തോടെ നടപ്പുണ്ടാർന്നു

ചെത്തികൾ പൂത്തൊരു കുറ്റിക്കാട്ടിൽ
കുട്ടികളോടി നടപ്പുണ്ടാർന്നു
കുണ്ടുകുളത്തിൽ കൂട്ടത്തോടെ
മീനുകൾ പോലെ പുളപ്പുണ്ടാർന്നു