കുടിലിൽ ഒരു കുട്ടി പിറക്കുന്നു
കുടിയനായ അച്ഛൻ്റെ ആദ്യ സന്തതി
കുട്ടിയുടെ കരച്ചിലിനും അമ്മയുടെ -
നെടുവീർപ്പിനുമിടയിലേക്ക് കുതിച്ചു -
വന്നൊരു കാറ്റ്
വാതിൽ തുറന്ന് കിതച്ചു നിൽക്കുന്നു
ക്ഷുഭിതയായ വയറ്റാട്ടി ഒച്ചയിട്ടു പറഞ്ഞു:
അടയ്ക്കൂ വാതിൽ കുഞ്ഞിനെ നീ -
തണുപ്പു കൊണ്ട് കൊല്ലും
പേറ്റുനോവിൻ്റെ ആലസ്യത്തിലും
പ്രണയം വർഷിച്ച ജീവൻ്റെ തുള്ളിയെ-
നോക്കി
അമ്മ നിർവൃതി കൊള്ളുന്നു
അച്ഛൻ അസ്വാസ്ഥ്യമുള്ള മുഖങ്ങളെ -
ഓർക്കുന്നു
അജ്ഞാത ലോകത്തിൽ നിന്ന് വന്നവരെ -
പ്പോലെ
ആരെയും കണ്ടതായി നടിക്കാതെയുള്ള -
ജീവിത ഓട്ടങ്ങളെ ഓർക്കുന്നു
ജീവിതവും മരണവുമെന്തെന്ന വിത്യാസ-
മോർത്ത്
രഹസ്യമില്ലാതിടത്തു നിന്ന്
നിഗൂഢതകൾ മാത്രമുള്ളയിടത്തേക്കു വന്ന
കുഞ്ഞിനെയോർത്ത്
ഇന്നത്തെ സന്തോഷത്തിനുള്ള കവർപ്പുള്ള -
മധുരം കഴിക്കാൻ
പുറത്തേക്കിറങ്ങുന്നു
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ