എവിടെ

'

മല
മഴ
പുഴ
താഴ് വാരം
സമതലം
കാട്
ഓർമ്മകൾ ഇന്നും
ഓലപ്പുര കെട്ടിമേയുന്നുണ്ട്

കഴുക്കല് മലയിന്നുമുണ്ട്
കുരുമുളക് കൊടിയില്ല
മഴയിപ്പോഴുമുണ്ട്
മാസം പിടിയില്ല

പുഴയവിടെ തന്നെ.....
പൂഴിപ്പരപ്പാണെന്നു മാത്രം
താഴ് വാരങ്ങൾ
മേൽ വാരങ്ങളെ-
അടർത്തിയെടുത്തു കൊണ്ടി-
രിപ്പുണ്ട്

സമതലങ്ങൾ
തല പോയതെങ്ങ്.
പുനം കൃഷിയില്ല
ചാമയും, എള്ളും കാണാനേയില്ല

പുളേളാർക്കുടത്തിൻ്റെ
ഈണമില്ല
പള്ള നിറക്കാൻ പാങ്ങുമില്ല
ഇല്ല ഒറ്റക്കൊള്ളി കട്ടൻ കപ്പപോലും.
എങ്ങും,
ടാർ റോഡും ,കോൺക്രീറ്റ് കാടും
മാത്രം

കാടുകളെല്ലാം കാടേറിപ്പോയിട്ട്
കാലം കുറേയായി
വനമഹോത്സവങ്ങളിലാണിപ്പോൾ
കമ്പം
പുനരുദ്ധാരണമാണു പോലും പുതുമ
പഴയ പല നിയമങ്ങളും
പുതിയ കുപ്പിയിലാക്കി
കുടിക്കാൻ കൊടുത്തു തുടങ്ങി

എന്നിട്ടും,
ചേമ്പും, ചേനയും
കാച്ചിലും, കാമ്പും, കാവത്തും
താളും, തകരയും
എവിടെ?!