തുരുമ്പെടുക്കാത്തത്....!

ആഴമുള്ള
കിണറാണ് പെണ്ണ്
എത്തിനോക്കിയാൽ
കാണാം
അഴകുള്ള സ്നേഹ
തെളിനീർ
ഇരുട്ടു നിറഞ്ഞ
മുറിയാണ് പെണ്ണ്
ഹൃദയത്തിന്റെ വാതിൽ
മലർക്കെ തുറന്നാൽ കാണാം
മനസ്സിന്റെ ഭിത്തി നിറയെ
കണക്കുകളുടെ കള്ളികളുള്ള
കലണ്ടർ
വിങ്ങി വിങ്ങി വെന്തുപോയ
കരള്
നിരാശയുടെ നരച്ച മരഭൂമി
ദുഃഖത്താൽ വെന്തുമലച്ച
തലച്ചോറ്
പെണ്ണങ്ങനെയാണ്
ചില നേരങ്ങളിൽ
എല്ലാം തകർന്നെന്ന്
തോന്നുമ്പോൾ
കത്തുന്ന കൃഷ്ണമണികളാൽ
ഒരു കൈ പിടിച്ചുയർത്തലുണ്ട്
തുരുമ്പെടുക്കാത്ത
തൂണാണ് പെണ്ണ്.