അനന്തരം

കടും ചായങ്ങൾ ചാലിച്ച
ചിത്രം
യുവത്വോന്മാദ ഹർഷം
പുളയുന്ന ഭാവമൂർച്ഛ
കാച്ചിയെടുത്ത പൊന്നിൻ നിറം
പാതികൂമ്പിയ കണ്ണിലെ വശ്യത
തലമുടിയുടെ തരംഗങ്ങൾ
പൊന്നരഞ്ഞാണത്തിൻ
ഇളകിയാട്ടം
അംഗലാവണ്യത്തിന്റെ
അപദാനങ്ങൾ പുകഴ്ത്താത
കരകളില്ല
ഭാവനയുടെ ചില്ലകളും,
ശിഖരങ്ങളും കൊണ്ട്
ആണിന്റെ ചിന്തയുടെ
ശൃങ്ഗത്തിൽ അവൾ.
അനന്തരം:
പെണ്ണിനെ കളിപ്പാട്ടമാക്കുന്ന
പെറ്റവയറിന്, കുടിച്ച പാലിന്
വിലയിടുന്ന
കാമ കോമരങ്ങളിൽ മടുത്ത്
വെൺചുമരിലെ
ചില്ലുകൂട്ടിനുള്ളിൽ
അവൾ എന്നന്നേക്കുമായി
സ്ഥാനം പിടിച്ചു.