തച്ചു കൊന്നില്ലെ......!

കാടു
കട്ടെടുത്തു നിങ്ങൾ
മലകൾ
പങ്കുവെച്ചുനിങ്ങൾ
കടലു വിറ്റു
കാണാപ്പൊന്ന് കൈക്കലാക്കി -
നിൽപ്പു നിങ്ങൾ
പുഴകളൂറ്റി മണലെടുത്തു
രമ്യഹർമ്യം പണിതു നിങ്ങൾ
കള്ളമെന്നും ചൊല്ലി നിങ്ങൾ
കൊള്ളയെന്നും ചെയ്തു നിങ്ങൾ
പണവു ,മധികാരവും
ചൊൽപ്പടിക്കു നിർത്തി നിങ്ങൾ.
കാട്ടുമക്കൾ ഞങ്ങളോ
കാടുകാണാതുഴറിടുന്നു
പട്ടിണിക്കോലങ്ങളായ്
പ്രാഞ്ചി പ്രാഞ്ചിനടന്നിടുന്നു
കുറ്റമൊന്നും ചെയ്തതില്ല
ഒരു കുറവും ചൊല്ലിയില്ല
എന്നിട്ടും;
വന്നെത്തി നിങ്ങൾ
കട്ടുവെന്ന് കള്ളം ചൊല്ലി
തച്ചു കൊന്നില്ലെ
കെട്ടിയിട്ട് കാട്ടു മക്കളെ
തച്ചു കൊന്നില്ലെ