ഉടലുരുക്കം

വയൽ ഒരനുഭവമാണ് .
വിശപ്പൊടുങ്ങാത്ത വയറുമായ്
വിണ്ടു കീറിയ ഉടലുരുക്കമായ്
മലർന്നു കിടക്കുന്നു വയൽ.
മുഖം വീർപ്പിച്ച മേഘങ്ങൾ
എങ്ങോ പോയ്മറയുന്നു
മോഹങ്ങളുടെ മദിരക്കുടിപ്പിച്ച
ആകാശവും
കാതിൽ കളികൾ ചൊല്ലിയ കാറ്റും
ചുട്ടുനീറുന്നു
അകാലവാർദ്ധക്യം അതിക്രമിച്ചു
കയറുന്നു
സ്മൃതിനാശങ്ങൾ അരിച്ചെത്തുന്നു
ഓതമുണ്ടാകുമ്പോൾ ഓർമ്മയിൽ
 മുളയ്ക്കുന്നുപഴയ വിത്ത്
കുളമ്പുപാടുകൾ, കുത്തിമറിയലുകൾ
ചിരിയും, കണ്ണീരും തേവിയ കാലങ്ങൾ
വിയർപ്പിന്റെ ഗന്ധങ്ങൾ
വാക്കുകൾവരച്ചിട്ടവരമ്പുകൾ
കർക്കടകം ചൊരിഞ്ഞ തിണർപ്പുകൾ
ഉറക്കൊഴിഞ്ഞ മനസ്സിലിന്നു കനവുകൾ.
പച്ചയിലേക്കെത്ര വേഗമാണ് വരൾച്ച
കടന്നു വന്നത്
വയൽ ഒരനുഭവമാണ്.