ഫ്ലാറ്റിന്റെ പത്താം നിലയിൽ
നിലച്ച ഘടികാരവും
നിശ്ശബ്ദതയും
തൂങ്ങി നിൽക്കുന്നു.
സംശയത്തിന്റെ നൂൽബലത്തിൽ
ഒന്നു കൂടി നോക്കി ഉറപ്പു വരുത്തുന്നു
നിസ്സംഗതയിലേക്ക് ഉറഞ്ഞു പോകുന്നു
അനാഥമാക്കപ്പെട്ടതു പോലെ
മൗനത്തിന്റെ ആഴങ്ങളിൽ
ആണ്ടു പോകുന്നു.
നാടും വീടും കഴിഞ്ഞ കാലവും
മനസ്സിൽ ചാടിക്കയറുന്നു
പാഞ്ഞു കളിക്കുന്നു
പച്ചപ്പുൽതകിടിയിലേക്ക് കുതിക്കുന്നു
മരങ്ങളിൽ മാറി മാറി കയറുന്നു
മലർന്നു കിടന്ന് ആകാശം നോക്കുന്നു
ഉരുണ്ടു മാറി കളിക്കുന്നു.
ഈ മുറിക്കുള്ളിൽ നിസ്സഹായനായി
പൊള്ളി നീറുന്ന വെറും മാംസം.
ചുമരിൽ നിന്നൊരു ഗൗളി
വാൽ മുറിച്ചിട്ട് ഓടിപ്പോയി
ഇല്ല എനിക്ക് മുറിച്ചിട്ട് പോകാൻ
ഒരു പ്രതീക്ഷയും
ഉറക്കം ഊതി വീർപ്പിക്കുന്ന
പാതിമയക്കത്തിലങ്ങനെ
പൊങ്ങുതടി പോലെ
എങ്കിലും ആകാശവീഥിക്ക് താഴെ
നാടിന്റെ തല വെട്ടത്തെ
അസൂയ മൂത്ത നോട്ടത്തിൽ
ഞാൻ ചുറ്റിപ്പിടിക്കുന്നു.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ