പാദുകമില്ലാത്തവനെ പ്രവേശിപ്പിക്കരുത്
പടിക്കു പുറത്ത് നിർത്തുക
പാടവും, പറമ്പും ,ചേറും,ചെളിയും,
ചവുട്ടി നടന്നവൻ
പാവനമായ സ്ഥലം പാദം വെച്ച്
അശുദ്ധമാക്കരുത്.
അഴകുണ്ടെങ്കിലും അഴുക്കടിഞ്ഞ
മനസ്സുകൾക്ക് മുന്നിൽ അവൻ
അകന്നു നിൽക്കുന്നു
ആക്രോശത്തിന്റെ ആണിയും
അടിമത്തത്തിന്റെ കുരിശും അവർ
അവനു നൽകുന്നു
ഗന്ധകം നിറച്ച തലച്ചോറുമായി അവർ
ഓർക്കാപ്പുറത്ത് അവനു നേരെ
കുതിച്ചുചാടുന്നു
അവന്റെ പെണ്ണിനെ കടിച്ചുകീറുന്നു
കുഞ്ഞിനെ പിച്ചിച്ചീന്തുന്നു
അവന്റെ കുടിലും അവന്റെ കൂട്ടും
മണ്ണ്
ചെളിയിൽ അവൻ വിളവായ് വിളയുന്നു
പൂവായ് പൂക്കുന്നു
അവന്റെ വിയർപ്പം, അവന്റെ രക്തവും
അവർക്ക് പഥ്യം
പക്ഷേ;
പാദുകമാല്ലാത്തവനെ പ്രവേശിപ്പിക്കരുത്
പടിക്ക് പുറത്തു നിർത്തുക.
അവർ ,പാദുകം പൂജിക്കുന്നവർ.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ