മൂന്നാംപക്കം

കടൽ പറഞ്ഞതൊക്കെയും
കദനകഥ

കാൽപ്പാടുകൾ തേടിവരുവാൻ -
ആരുമില്ല
ശ്രീരാമനോടു തോറ്റതിനുശേഷമോ
ഇത്രയും ക്ഷോഭമെന്നു ഞാൻചോദിച്ചില്ല

കഠിനപദങ്ങൾ വിളിച്ചുപറയരുത്
കരയുന്നസത്യത്തോട്

ഇറ്റിപ്പോകരുത് ഒറ്റത്തുള്ളിക്കണ്ണീരും
കണ്ണീരുകൊണ്ട് കാൽപാദംകഴുകുന്നവൾ -
കടൽ
ലഹരിയുടെകടൽ ഇനി കുടിച്ചുതീർക്കണം
കടലെന്നെ കാമാതുരനാക്കുന്നു

ഒരു കൂറ്റൻതിരമാലക്കൈയ്യാൽ
അവളെന്നെആലിംഗനം ചെയ്യണം
ക്ഷോഭത്തെ സ്നേഹം കൊണ്ടെനിക്ക് -
കീഴടക്കണം
നിമ്നോന്നതങ്ങളിൽ നീന്തിത്തുടിച്ച് -
കാടുകളിൽ കടപുഴകണം

ആ മാറിൽ പറ്റിച്ചേർന്നുകിടന്ന്
മൂന്നാംപക്കം മടങ്ങിവന്ന്
മണ്ണിൽ മലർന്നുകിടക്കണം