ഓർമ

ഓർമ്മ,യോലക്കുടയും പിടിച്ചു -
ഞാൻ നടന്നു പോകുന്നു
നാട്ടുമാങ്ങാച്ചുനയുണങ്ങിയ -
പാടു തേടുന്നു
കുണ്ടനിടവഴി, കണ്ടം, കോണിയും -
കൊള്ള് കേറിപ്പോയ്
കണ്ട കുണ്ടാമണ്ടിയോർത്ത്,ഓർ-
ത്തു ചിരിച്ചുപോയ്

കർക്കിടകരാവുകോലം കെട്ടിയാടു -
മ്പോൾ
കുർത്തപല്ലിൻമൂർച്ചകണ്ടു ഞെട്ടിയു -
ണരുമ്പോൾ
അമ്മമാറിൽ മുഖമൊളിച്ച് തേങ്ങലട-
രുമ്പോൾ
വിരിഞ്ഞ കൈകൾ മുറുക്കിയമ്മ -
മുകർന്നു നിൽക്കുന്നു

പൊട്ടിയസ്ലേറ്റ് തുപ്പൽകൂട്ടി മായ്ച്ചി -
ടുന്നേരം
ഒട്ടിയവയർക്കാളൽപാടേ മറന്നിടു-
ന്നേരം
പണ്ടൊരുനാൾ പാഠപുസ്തകത്താ -
ളിലേ,യുമ്മ
അടുപ്പിൽവെച്ച വെള്ളം തവിയാലിള -
ക്കിടുമ്പോലെ

എൻ്റെയമ്മ തവിയിളക്കി കരഞ്ഞിരു -
ന്നൊരുനാൾ
കരയരുതെന്നമ്മ, പശിയെനിക്കില്ല -
യെന്നോതി
കോന്തലയാൽ കുഴിഞ്ഞകണ്ണുക -
ളൊപ്പിനിന്നതും
കരഞ്ഞു പോകുന്നിന്നു,മോർമ്മ-
കണ്ണീർ വാർക്കുന്നു.