പ്രണയമഴ

പ്രിയപ്പെട്ടവളേ,
മഴയിൽ നിന്നുമൊരു മൊഴികേട്ടിടുന്നു -
ഞാൻ
മിഴിയിലെ വികാരവായ്പ്പറിയുന്നു
മഴയിലും എന്നിൽ വെയിൽ പൂത്തു
നിൽക്കുന്നു
നീയോ,തപിക്കുന്നൊരഗ്നികുണ്ഡം

നിൻ്റെ ചുണ്ടിലേചെറിപ്പഴച്ചാറ്
എൻ്റെ ചുണ്ടിലത് ഉഷ്ണമായ് പടരുന്നു
പ്രണയ ജ്വാലകൾ പരക്കുന്നു നമ്മിൽ
മദിര പതഞ്ഞു തുളുമ്പുന്നു ചുറ്റും

അലസ ലാസ്യത്തിൻ നെറുകയിൽ വന്യ -
ചുംബനം കൊണ്ടൊരു കോട്ട കെട്ടുന്നു
അടഞ്ഞ അധരത്തിൻ കതകു തുറന്നു നീ
ആർത്തിയാൽ വീഞ്ഞു തേടി നടക്കുന്നു

രസനതൻ രുചി പോരാതെ പിന്നെയും
പ്രണയ സമുദ്രത്തിലുല്ലസിക്കുന്നു
മഴകൾ മിഴിയടക്കുന്നു നാണത്താലെ
വെയിൽ പൂത്തമരമായി നിൽക്കുന്നു
നമ്മൾ

പ്രിയപ്പെട്ടവളേ,
മഴ നമ്മളിൽ ഗാഢമായ് പെയ്യുന്നു
ഗൂഢമാം സ്മിത നിർവൃതി കൊള്ളുന്നു
നീയുറങ്ങുന്നു
ഞാനുറങ്ങുന്നു
പ്രകൃതി ആനന്ദനൃത്തമാടുന്നു