പ്രണയത്തിൻകുത്തൊഴുക്കുപോലെ
രക്തം കാതിൽനിന്നുമൊഴുകി
മുറിച്ചെടുത്തകാത് വിൻസെൻ്റ് അവൾക്കു -
നീട്ടി
കൈയിലെ സൂര്യകാന്തിപ്പൂവിൽനോക്കി
അവൾ നെടുവീർപ്പിട്ടു
നഷ്ടപ്രണയത്തിൻപരിദേവനമോ
ഇഷ്ടപ്രണയത്തിൻമൂകസാക്ഷിത്വമോ ?!
തിരിച്ചറിയാത്തൊരു വികാരത്തിൻ്റെ വിത്ത-
വളിൽക്കുരുത്തു.
മൂകമായൊഴുകി മുറിഞ്ഞകാതിൽനിന്നും -
കൈക്കുടന്നയിലേക്കുരക്തനദി
ശിലാസ്തൂപമായ് നിൽക്കുന്നു പ്രണയിനി
അവനോ തപിക്കുന്നുപ്രണയാഗ്നിയിൽ
കാതിൽക്കുരുത്തോരു സൂര്യകാന്തിപ്പൂവ്
കത്തിജ്വലിക്കുന്നു സൂര്യനായി
ഹാ! പ്രണയമേ,യില്ലില്ലയിന്നോളം നിന്നോളം
ശക്തി, തേജസ്സുകൾ മറ്റൊന്നിനും
കാതല്ല, കണ്ഠ,മറുത്തുനൽകീടുവാൻ -
മടിയേതുമില്ലയീ പ്രണയത്തിന്
മീട്ടുന്നുവാൻഗോഗ് പ്രണയത്തിൻ മൂർച്ഛയാൽ
കാതിലെസൂര്യൻ്റെ പിടയുന്നതന്ത്രികൾ
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ