ഒറ്റത്തുള്ളി

ഇന്നീ മഴപ്പെയ്ത്ത്
അലോസരമാകുന്നേയില്ല.
അനേകം നാശനഷ്ടങ്ങളും
ദുരിതങ്ങളും വിതയ്ക്കുന്നു
ണ്ടെങ്കിലും.
മേൽക്കൂരയിൽ ഒറ്റത്തുള്ളി
വീണാൽ
നെഞ്ചു പിടയ്ക്കുന്നകാല-
മുണ്ടായിരുന്നു
മലർന്നു കിടന്നാൽ
മോന്താഴത്തിലൂടെ
നക്ഷത്രങ്ങളെ കണ്ടിരുന്ന-
കാലം
ഏതോ പാതിരാവിൽ
നല്ല ഉറക്കത്തിലായിരിക്കും
നെഞ്ചിൻ കൂടിലേക്ക്
തകര പാത്രത്തിലെന്നോണം
വെള്ളം വന്നു വീഴുക
ദേഷ്യവും, സങ്കടവും
തളർച്ചയിലും ശരീരത്തെ-
വലിച്ചൊരുയർത്തലുണ്ട്
കീറപ്പായ ചുരുട്ടിവെച്ച്
ചുമരുചാരി തളർന്നിരി-
പ്പുണ്ടാകുമപ്പോൾ അമ്മ
അച്ഛൻ ചാക്കു വിരിപ്പിൽ
ചുരുണ്ടു കിടപ്പുണ്ടാവും
പഴുതാര മൺകട്ടവിള്ള -
ലിൽ നിന്നും
സ്വൈര്യ വിഹാരത്തിനിറ-
ങ്ങുന്ന നേരം.
നിദ്ര നനഞ്ഞു കുതിർന്ന്
തണുപ്പായ് പറ്റിപ്പിടിച്ചിരിക്കു-
മ്പോൾ
എത്ര പ്രാകിയിട്ടുണ്ട് മഴയെ
ഇന്നീ മഴപ്പെയ്ത്തിൽ
സുഖിച്ചുറങ്ങുമ്പോൾ എന്തു
രസം
ഇതുകൊണ്ടാണ് പറയുന്നത്
മനുഷ്യൻ നന്ദികെട്ടവനെന്ന്
കണ്ടാലും കൊണ്ടാലും
അറിയാത്തവനെന്ന്
അറ്റു വീഴുന്ന ഓരോ മഴത്തു -
ള്ളിയും
അലറിപ്പൊലിയുന്ന ജീവിത -
മാകുമ്പോഴും
നാശങ്ങളും, ദുരിതങ്ങളും
ആഘോഷിക്കയാണിന്ന്.